1-الوقاية من الحر وفى عز ما الجو يكون نار هتحس بتراوة
2-لو انت اصلع اساسا الحلقـة الزيرو هاتدارى كنوع من التمويـة
3-الناس كلها تحترمك من سواق التاكسى لحد مديرك فى الشغل كل واحد منهم هايقول فى سره ده اقرع ومش همه حاجة وممكن يعمللى اى حاجة يعنى كفاية انك تخش خناقه او حتى تعمل نفسك انك هاتخشها كله هايفلّق الا اذا كان الفريق التانى كله قرع تبقوا قرع فى بعض وهاتبقى كارثه وكمان ممكن الناس تفتكرك شرطة او حربية او ماشابه فالناس كلها يحترموك ويسلطحولك قفاهم وعلى رأى المثل الجنية غلب الكارنية والدبورة غلبت الاتنين
4-اسلوب رائع للتنكر الناس كلها مش ممكن تعرفك وخصوصا لو كانت مرتك الاولى يعنى ممكن واحد رخم كان هايوقفك ولوكلوك ساعه الزلبطة هاتكفيك شره واللى انت تعوزة هاتنده علية
5-لما تحلق اقرع هاتحس بالتجديد وبعدين هاتحس نفسك زى الطفل اللى لسه نازل من بطن امه وعندك فرصه تبتدى حياتك بالقرعة من جديد
6-عشان تعود البت بتاعتك انك ممكن فى يوم تقرع عشان ماتجيش ربنا يدينا ويديك العمر بعد عشرة عشرين سنة تقولك انا واخداك بشعر واحنا متفقناش على كده وهى عالارجح هاتكون هى السبب فى القرعة دى
7-منظرك هايبقى جذاب جدا وانت ماشى مع مراتك وخصوصا لو دهنتها زيت - القرعه طبعا مش مراتك - الناس هاتقول دة مقطعها
8- توفير نفقات الفرش والشامبوهات والزيوت والكريمات و فلوس الحلاق وتوفير وقت التسريح
9-ايحاء رهيب بالثقه فى النفس لان مش همك حد يعيب عليك وهو مين اصلا الحد اللى هايسمح لنفسه انه ينتقد مظهرك هو هايصاحبك يعنى
10- تماشيا مع كبار النجوم القرع واللى بيحلقوا زلبطة , ديفيد بيكهام , براد بيت , بروس ويلز , توم كروز , واكتر من تلات تربع لاعيبة الكورة بالاضافة الى فردوس عبدالحميد فى مسلسل السائرون نياما
11-جه الوقت اللى الواحد فينا لازم يهتم بشعر حواجبه ويولية اهتمام ورعاية خاصة ويتفرغله ويبقى هو الوحيد اللى عالحجر ويبقى شعار المرحله من واجبى اظبط حواجبى
12-الناس ممكن تاخد فيك قلم ويفتكروك راجع من عمرة ولا حج ولما تيجى سيرتك يقولوا دة راجل حاجج بيت الله وانت ممكن تكون زلبطة صايع وضايع والبيت الوحيد اللى زرته كان بيت الزواحف
13-لما تروح تشترى هدوم وتقيس تيشيرتات او لما يبقى الهوا جامد فى الشتا مش هايهمك ان شعرك ممكن يتنعكش منين يا حسرة مكانش انعذر ولا باع جزر ولا قالشى اسف واعتذر
14-مستحيل وانت ماشى فى الشارع واحد رخم من اللى بيوزعوا اعلانات يوزع عليك اعلان محل حلاق جديد بس للاسف الميزة دى ليها تمن لان هاتلاقى اعلانات مراكز علاج الصلع وزراعه الشعر نازله عليك بترف من كل ناحية
15-لما تحلق زلبطة هاتبقى مضرب الامثال زى القرعه تتباهى بشعر بنت اختها واللى رمته القرعه تاخده ام الشعور وهكذاااا
16-القرعه ممكن تبقى رابط اجتماعى بينك وبين صحابك القرع اللى زيك وممكن تعملوا رابطة وتسموها زلبطة بلا حدود
17-ممكن تطلع فى اعلان الطواقى وبواريك او حتى السيراميك على اساس ان نعومته مستوحاه من الزلبطة الطبيعية بتاعتك
18-مستحيل تشيل هموم على دماغك لانها هاتتزحلق وش
نرجو احترام الذات فى الرد والرد الغير اخلاقى سيتم حذفة